تخيل العالم بـلا حـس واحسـاس=تخيل ان الناس راحو مـن سنيـن
بتحس بالضيقه وبالراس وسـواس=وبتقول ياويلـي وياشيـب هالعيـن
بكتبلك ابيـاتٍ تسـاوت باللمـاس=درسٍ عن ادروس المدارس بدرسين
لو لا المحبه تجمع النـاس بالنـاس=ماشفت بعض الناس للناس وافيـن
ولو لا الكرم ماشفت للناس مجلاس=حتى ولو شالو على الديـن بالديـن
صحيح ماكل الخلايق علـى سـاس=ناسٍ على شده وناسٍ علـى ليـن
لاكن توقع لاتجي الفـاس بالـراس=وتقول ابي وحده وتنحـاش ثنتيـن
شفني على همي وانا اقول لا بـاس=يمكن تزين اليـوم ولا بعـد حيـن
خلك وسيع الصدر لاتصير حسـاس=لايزعلك هرج القفى من خسيسيـن
دنياك يامحمد مثل وصف هالكـاس=يقطع ضماك ولا يصبـرك يوميـن
ولامثل حبـرٍ علـى كـل قرطـاس=خطرٍ يزول الحبر من دمعـة العيـن
بالعقل والتفكيـر والعـزم والبـاس=تقدر على خصمك تغيـر موازيـن
واخذ الحذر لا تمشي بدرب الانجاس=ناصحك ثم ناصحك عن دربه الشين