الذيب كانه ذيب يدرع فالذياب =يخلي الخرفان للضبع العويق
العام خذت البيرق وصدت العقاب=يوم الرجال حلوقها من دون ريق
أسرجت شعري والجماهير الزهاب=وإسنادي بلاد وولد عم ورفيق
وحولت فالوادي وهو دونه ضباب=مدري ورى الوادي مطر ولا حريق
كم فارس وده يحول غير هاب=يستوحش الماخوذ لاشاف المضيق
أقدمت والفرسان ترتاب وتهاب=أجري الهياب وأجر الطريق
ومثلت داري بالقصيد وبالجناب=من الشمال إلى العديد إلى العريق
ترابها بالحس ماحسه تراب=وحزومها تسوى الزمرد والعقيق
ومثلت راية من تلين إله الرقاب=صليب راي وكفو وحجاجه طليق
ممشاه للعليا ذهاب بلا إياب=الشيخ ابو مشعل حمد علم دقيق
ومثلت كل الشعب من شايب وشاب=بدو وحضر تاريخنا عز عريق
ومثلت ربع فالوغى مخلب وناب=مرية تاريخنا ماهو لفيق
حن مزبن اللي لايجار ولايثاب=وحن فزعة اللي ذودهم راحت وثيق
أقدامنا جبال وعمايمنا السحاب =وأمجادنا تشبه سهيل إلها بريق
ومثلت يام بكبرها والإنتساب=إلى بني همدان نجم له شعيق
الله خلقنا سيلا متونه هضاب=كل السدود يحطها حب دقيق
شاركت متوكل على منشي الحقاب=وحزامي من الشعر والعدة يضيق
وطرقت بيبان القواقي باب باب=وقدمت ماشفتوا جميع إنه يليق
وحشمت أذانيكم عن سقاط الخطاب=ورقيت بأيديكم على قمة طويق
وعدت داري بالفخر قبل الكتاب=ووفيت بأمر الله بالعهد الوثيق
وسترت بأفعالي مزينة الخضاب=وقهرت عدواني ونومست الرفيق
ولطم بعيري شوط واحد للركاب=يقوم راس وينتهي ماهو زريق
ومن كف ابو خالد تسلمت النصاب=من كف من عينه على القمة تويق
شيخ يروم المجد ويروم الصعاب=خلى الشعر من نومة الغفلة يفيق
واليوم لاوالله شفت القاف شاب=صار الشعر كورة وكل له فر يق
وضاع الهدد بين الحديا والغراب=وضاع الصهيل مكرمين من النهيق
إلا الرجال اللي قصايدهم عذاب=اللي لها معنى بها حس رقيق
لاتشعل الفتنة ولاتطرد سراب=ولايرقع مانقصها بالزعيق
بس العرب ماعاد تدري بالصواب=ماميزوا ويش الزفير من الشهيق
من جاب ضيعة قيل شوفوا ويش جاب=انا اشهد انه جاب له معنى عميق
الذيب كانه ذيب يدرع فالذياب =يخلي الخرفان للضبع العويق
ماجيت انافس جيت دعما للشباب=وفوزي دمه عاده على القمة يريق