امر تدلل واطلب اللـي يراضيـك=انا اعرفك زعلان ياروح روحـي
ارفق على مغليك يـاروح مغليـك=لا تبتعد والقلـب بعـدك ينوحـي
قل وش تبي تأمر وانا اقول لبيـك=وتعال شوف القلب ناظر جروحي
ماني على اللي صار يازين ناسيك=لا كن ظروف الوقت عيت تروحي
شوف الدمع من فوق خدي يناديك=يابهجة ايامي وعالـي صروحـي
انا الذي بالقلب والـروح شاريـك=ارضاك ياخلي ينافـس طموحـي
دقق وشوف العين ياكيف ترجيـك=هاذي دلال الشوق جاتك تفوحـي
قلطتها لرضاك يمكـن تراضيـك=هذا كلام الجـد خـل المزوحـي
ماني من اللي قصده انـه يبكيـك=لا كن علينا الوقت صاير شحوحي