ظروف الايام ماتمشي بطيب وطيب=من طاب فاله تعكزبه على شونها
تموج موج البحر سباحها يستهيب=مقدره ياتجيهم اوهم يجونها
كم من عليل اذا اطعم غلها مايطيب=يكابر وعن عيون الناس يخفونها
تاخذ طلبها من الانسان لو بالغصيب=تضحك بوجهه وتمشيله على هونها
بطش الاسد بطشها وعيونها عين ذيب=تثني عناد الرقاب بطبقة اسنونها
اهدافها في براح وجسمها سد غيب=كل البواريد ترمي مايصيبونها
يرمون بالفرد والرشاش عيت تصيب=اشكالها للرجال تضيع خمونها
اطيع واعصا وكابرلو جرحي عطيب=منهو نشدني اقله جات ياهونها
عشان لايدري القاصي ويفرح قريب=لوحصلوا حاجه شويه يزيدونها
مسكين بين اهله وربعه وعايش غريب=سبعه غرايبك يادنيا يقولونها
يادار واللي طرالي كان فيها نصيب=ابدل الغرب فيكم وابلع اغبونها
دام السواد اغتشا اضهور الحرار النجيب=الثانيه ماكشف غطاها وماعونها
دار الجفا ماتنفسنا هواها الكئيب=لو الشجاري ثمرها ميل اغصونها
رحيل وموادعه لو الموادع صعيب=البعد يمحى حلاوتها وليمونها
تهون مادام لاصاحب ولالي حبيب=جعل الحيا ماتخيل يمك مزونها
مشيت والدار وفؤادي تناحب نحيب=بكت عيوني ومثلي تبكي عيونها
ماني لبعض المعاني والسوالف طريب=لكن ابا اشوف غايتها ومضمونها
لوسوقها والشرا والبيع باليانصيب=السوق غالي لسلعه مايسمونها
وخالف وتعرف وعلم للمودي يجيب=خالف وعلم وتلفا اللي يودونها
انا العتيبي من ارجالن تعز النسيب=ربعي عزاز الاسامي حين يطرونها
راع الكرم والشجاعه عندنا والخطيب=خطبه على ملة الاسلام يقرونها
ونعم بكل القبايل دون شكه وريب= الارض برجالها والدار بحصونها