من امس واليوم مرقابي على روس المراقيب=امامي اربع جهاتن كلهن قطرن خلاوي
احب قطر الخلا واعوي مثل مايعوي الذيب = يوم ان كلن هجع يقنب على رجمن سماوي
الشمس تطلع من المشرق ويم المغرب اتغيب =وانا لحالي على المرقاب من همي جلاوي
يالله يافارج الكربات يللي تعلم الغيب =ياعالم بكل حي وكل من بالقبر ثاوي
ياربي انك قريب اذا دعاك الداعي اتجيب =رحمتك باللي من اول كان في حبي فداوي
واليوم بين اللحود مركبه بالقاع تركيب =والموت من حكم ربي مايداويه المداوي
ياصاحبي من بعدكم عايفن كل الاصاحيب =انا شفي وانت ماغيرك بذا الدنيا شفاوي
يبو جدايل يذوب ابها النظر من غير تكذيب =متهزعه مثل غصنن من غزير الجم راوي
وعطاك ربي عيونن رمشها عكش ومهاديب =يشعل بها بارقن يخضع له القلب القساوي