شعر النسا ماهو بتجميع قيفان =صادق ولا هو ضارب ٍ فالقوانين ..
ياللي تقول ان الشعر خص بفلان=اصدق شعور الشعر عند النساوين
ام وحبيبه..صاحبه ..ربع خلان= وحده وبعيون الغلا عن ملايين
(ومن قال شعر البنت كذبٍ وبهتان=اصله رديٍ من سلايل رديين)
من قوم اهل القول مخفوضة الشان = اللي حكاهم ياصلك لو بعيدين
اللي رغاهم يكثر ان قيل له حـان=تشويه صوره او بالاحرى سكاكين
تطعن ظهر انثى تعاني ... بالاحزان =وتسج في طاروق يبري مصابين
من اول الدنيا وهي ... اخت فرسان= تمدح فعايلهم بوسط الميادين
وافعال بقعا ... شاهده طول الازمان=فابيات شعر ٍ مارجت فالدواوين
قام يتناقلها من لسان ... للسان =تاريخ والتاريخ .. اصل وبراهين
شعر النسا ماهو بصوره ... والوان = مثل الذي وسط المجلات ذا الحين
ولاهو بكثر اقوال وهياط وان كان= متحدره من اصل شيخ وكريمين
ولاّ الشعر وان عوّدت (نبض انسان)= ماخص به جنس ٍ ولاخص به دين
كتلة مشاعر(حس)و(شعور)(وجدان)=طاري وطيف وجو يسأل على وين؟
اما نصوغه بين قيفان ... واوزان =نزف ومشاعر دون اسم وعناوين
ولا بنبكي خلف حيطان جدران = ونحبس مشاعرنا ورى قول: بعدين
تقولها اللي مارقت فوق الامتان = وماجات تشحذ ياطواريق (تكفين)
اطوّعه غصب ٍ ولو كان ماكان = واجيب راسه واسكنه داخل العين
شعري ماهو برخيص وان كان بأحيان= يصبح عدوٍ لي بصف المعاديين
ماهو بعسرة قاف او ضيعة اوزان = الا اذا بفرح بكى ...(خاطره شين)
واقول انا في خير.... وابشرّك زان= حالي وحالي والبلا.. ماهو بزين
انثى صغيره والحزن يعزف الحان = عمري وانا مابعد ...كملّت عشرين
اشوم عن درب الخطا دون حلفان= واعرف مكانة موضعي بين الفين
واجيب جزلات المشاعر على شان = اطرّب مسامع عود يسوى كثيرين
اللي يعرف الطيب ويجيد الاحسان = واسمه صدح في بعد ولا قريبين
ماهو من اللي تالي الوقت شرهان= ويحط له ديوان بين الدواوين
ويمدّح فعوله ..كذوب ٍ ومنهان = ويقول : انا اللي من سلايل عريبين
الطيب ماهو بن فنجال ولســــان = يقعد يهايط فيه... بين المجانين
لطيب طيّب ... للمواقيف شجعان = فريس ماهم من عبيد السلاطين
لشعر هامه ولشواعير ... ميدان = وكل بيظهر ماكره ... بالميادين

المشاركة الأصلية كتبت بواسطة فواز علي الروقي سهوم المنايا اختي ملاك القصر كيف الحال عساك بخير قصيدتك هاذي كتبت لك عليها في منتدى الشعر زي ماقلتي وكانت من القصايد التي تعجبني رغم انك شاعره وانا من جمهورك وقصايدك كلها فاخره وفقتي في الاختيار كوكونك امراءه وشاعره واخترتي الموضوع المباشر في توضيح شخصيه الشاعره بانها امراءه فهاذا يدل على انك ذكيه وبارعه على العموم صح لساااااااااااانك تحياتي لك وبالتوفيق