سطام جينا طالبينك ياسطام=جينا بوجه الله وإله التجينا
ثم عقب ربي في وجه سيف الأسلام=في وجه أبو متعب طويل اليدينا
وفي وجه سلطان السعد ذخر الأيتام=وفي وجه آل سعود والمسلمينا
جيناك تكفى ياأبن الأجواد صيام=يبّس حناجرنا الضما ولا كلينا
صيام وجينا ألك حفاي الأقدام=وإن كان تعفو بالحبي لك حبينا
اللي مضى قد راح من عدة أعوام=عشرين عام وأبن عمك سجينا
من فينا ماأخطى بيوم من الأيام=منهو وأقول إن الخطى بس فينا
غرتنا هالدنيا ولأنفسنا ظلام=والله كاتب اللي جانا يجينا
سطام تكفى لاتردك الأوهام=غير العمل بنموت ماشي خذينا
أخذ الأجر من خالق الكون بغلام=ضيّع شبابه وعلى فعله حزينا
أبوه مات وهو وسط سجن الأجرام=بلاه ربي يالله لا تبتلينا
وأمه عجوز تشوف زوله بالأحلام=والحزن فاتق قلبها من سنينا
عشرين عام وكل أهاليه بآلام=ويرجون رحمة الله أوو ساجدينا
تكفى بوجهك خل مافات وقدام=تكفى بما صابه تقول أكتفينا
تكفى وحنا لو تبي ألك خدام=باللي تبي منا ترانا رضينا
أو أنا بدلني بصالح ياسطام=قلي مشينا وأقسم إنا مشينا
بس أرحم اللي تبكي الليل ماتنام=أمه وتدعي إن قلبك يلينا
الله سبحانه غفور ٍ للآثام=وحنا عبيده كيف لو ماعفينا
والله هو الرحمن ووصى بالأرحام=وهذا أبن عمك والأجر لك ثمينا
لو كان أبوك بيرجع بحكم الأعدام=قلنا أبوك أبدى من العالمينا
لكن كتبها ذو الجلال والأكرام=والعفو عندك بعد رب ٍ دعينا