السلام عليكم
وقبل لا ابتدي
أسمحولي أفضفض قبل هالفضفضة الخفوق المعنى أنبغى يهتدي ما عليه الا يسمع من حديكم عضة والنبل بالمعرب يمنعه يعتدي والمعرب ابنبله يشفي الله مرضة والصدف للامانه ان نوتك بأمر وكْل الله مامنها مفر وفكاك والسلام المسمى بالنهايه ختام وسأل الله يرحم من حفظ والديه .
(((( لا يمكن لا ))))
هيه ياللي اتقول شخبار السفر
السفر ماعاد له عندي طرات
السفر للي مثل حال يضر
السكن ايجار والراتب فتات
وبالسفر أصلا انا عدت النظر
وأكتفيت بما يبث النيل سات
لكن اسمع بالشديد المختصر
عن اماني قاصرات وطايلات
واهني من اكد الحجز لمصر
ثم شلع من فوق ام جنيحات
طائرة بوينغ من صنع الكفر
وتذكرتها من خطوط الامارات
وطب مطار القاهره عقب العصر
وهاتفه النقال سوابه سوات
وفي شيراتون الجزيرة اسقر
فندق ن يقبل نظام الفوتشرات
ثم نزل للوبي اللي مدهر
بالشباب وبالحريم وبالبنات
ويوم حصل طاوله عقب العزر
واستراح شوي جاب الخافيات
قام ايعد اديونه صارن وشكثر!!
وغاب عن وعيه وزهد كل الحيات
وماوعى الا بوحدتن مثل القمر
تبتسمله ولابسة لفه وعبات
شافها وقلبة بغى منه يزر
لولا انه من عروق ن طيبات
واشرتله وجاها يمشي في حذر
وعند باب اللفت قالت هات هات
هات علمك قال انا علمي بحر
قالت قوله واعتبر مافات مات
قال انا مديون وحالي في خطر
من ظروف كافرات وجايرات
قالت دينك كم وبلهجة امر
قال تسع الاف دينار بثبات
قالت هذا شيك ورح قبل الفجر
اصرفه من البنك وارجعلي زتات
وراح يصرف شيكها وهو منبهر
وانبهاره له دواعي مغيبات
ويوم صرف شيكه وحول وادخر
رد حق اللي عديمه بالصفات
وقبل يشكرها ولله الشكر
بادرته ابسمه من احلى الشفات
وقالت يكفي يابعد عمري السهر
نام وقبل اتنام لاتنسى الصلاة
وراح يمشي لغرفته دافن فقر
ونام نومة عز لاراحت وجات
وعند تمام الساعه الوحده الظهر
دق هاتف غرفته وشاله برهات
قال الو قالت الو قام وطمر!
ورحب وهلا بها باربع لغات
قالت الليله الوعد عند النهر
لاتغيب وقال حاضر يالغنات
ويوم جاها شافها باحلى الصور
لبس حشمة وزين ودين وطيب ذات
قالت اسمع يابعدي بعد النظر
مايحلل بعض امور امحرمات ؟
وانا وحدة مؤمنه برب البشر
ومن ارجال ومن حريم صايبات
وارملة من اربع سنين وشهر
وعائلتنا من كبار العائلات
واذا ودك بالعلاقة تستمر
حللو (((( المسيار)))) أئمه ثقات
حضر اشهودك واقل وادنى مهر
وابشر بكل ماتبي والخير آآآت
قال انا لي الفخر اقضي العمر
مع هنوف ن تمتلك نصفك صفات
قومي ماعندي لطلبج انتي عذر
والشهود ابمصر الاف ومئات
وملجو واستاجروا شقة قصر
وخمس وعشر ايام ماذاقوا المبات
عايشين بعز لاهم وكدر
والقلوب من المحبة عامرات
وفي ضحى يوم الشقى السادس عشر
الضحى اللي ضيق الاربع جهات
دق على غمة شريكة العمر
ام اعياله وام كل النايبات
وقبل ايسلم قالت وينك لك شهر
غايب عنا عسى عمرك فوات!!!
غايب وحنا تحت خط الصفر!
انتغدى وانتعشى مثلجات!!!!
قاعدن بالقاهره جنك بزر
ومسرفن في صحتك بالمهلكات!!!
قال لحظة اللي تقولينه كفر
خوفي الله رب كل الكائالت
من قبل اخذج ياوجه الفقر
مامسشت رجلي دروب الموبقات
حافظن نفسي للعلك للكسر
عن جميع ادروب كل المعصيات
وقبل اسافر جلت بالنوط الحمر ( النوط الحمر العشرة دنانير كويتية )
ماجلة بيتج بخمسين خوات
ومثلهن لكن من النوط الخضر ( النوط الخضر العشرين د ك)
في يدج حطيتهن ومحزمات
ومن قبل هذا وذا عندج خبر
بكل شي سويتلج في هالحيات
عاصرن عمري لجل عمرج عصر
عشر اسنين ماركبت الطائرات
مرفهج ومن الفقر اركب شفر
امدللج باحلى واغلى الماركات
ومتعج باحلى الكلام وبالشعر
وبالهدايا الي بدون مناسبات
وبيتنا ايجار والادهى ومر
موفرلج فيه اربع خادمات!
وسايق وسيارة واردها البشر ( مرسيدس )
ماهي سوبر جمس او بيجو وفيات
يالغثا يالسم يا ام الجكر
ياعقوبة حد رمي المحصنات
يانقيضة كل ماقل وندر
يازعيمة النساء الامعات
ماتركتج والسبب واحد اغر
لان امج غير كل الامهات
قالت اسمع قال كافي والصبر
له احدود واسمعي ومافات فات
روحي انتي طااااااااااااااا وفي لمح البصر ( طاااااا يعني طالق )
جاته تركض فازعة بنت الذوات
قالت تكفا يابعد عمري استخر
لالالالالالا تكمل ابغض اللي محلللات
واستخار وضمته لطيب صدر
وكفكفت دمعه بيديها الطاهرات
وقامت اتهديه وتذكرله عبر
عن مآسي عيشة اللي مطلقات
وقالت حنْا طال هالوقت او قصر
بالعقل والدين والله ناقصات
وهذي مهما كان مامنها مفر
ام عيالك زوجتك ام البنات
لاتقاشرها ترى عمر القشر
ماوراه الا الدروب المظلمات
قال حاضر ثم لدت بالبصر
يم ادنى رجل ادنى الطاولات
وقالت ابشر ماتكسر ونكسر
هاتفك اللي هو اصل المشكلات
ويوم شاهد شاشته فيه انبهر
وطارت اعيونه ونشف ريق اللهات
اثر ام اعيالة عالخط تنتظر
وسمعت مادار كله في سكات
وحس ابكاها ينفطر منه الحجر
ويودع اهل المعصية ناسن تقات
وحز في نفسه ابكاها وانقهر
وكل عزاه ان الامور مقدرات
وغلق الهاتف ودمعه منهمر
انهمار السيل بجبال السرات
وقام يقرا الحمد وقصار السور
وعنده اللي اعروقها امعربات
اتلاطفه وتهدي روعه بالذكر
ذكر من يعرف خفا اللي خافيات
ويوم هدى وارتاح حطتله عطر
ونعنشتله شاي معدوم الصفات
وقالت والله اني لنذرلك نذر
الالوف الكاش فيه مدبلات
لين بيتك مثل ماكان يعمر
باذن من بيديه رزق العاجزات
قال يافخر البدو ويا الحضر
رايتج بالطيب فوق النايفات
ولوسمحتي يابعد بيض وشقر
انسي هالموضوع رومي المقبلات
قالت ابشر واستباح احلى ثغر
وقيلوا وياطيب حظ القايلات
ويوم قامت خططت لحلى سفر
وسافروا سفرة كما السكر نبات
راحو روما وديرة الطرف الاغر
وماربيا جوها باغلى الباخرات
وتركيا جوها وطبو بالمجر
وصار موقف وسط سوق الخردوات ( لا يمكن لا )
لولا رب الناس ثم خشم الدولر
كان اعلوم ولا جزا الله البايجات
وردوا يم القاهره غصب وجبر
شهر وعشر ايام ماهي قليلات
وامرحوا ليلة وقمر ربي بدر
مايضاهيه ابحلاه الا المهات
وليلة يرجع ديرته حس بضجر
وضيقته بالصدر تزفر أهأهات
وهو على هالحاله اللي ماتسر
التفت وفي وجه احلى الكاعبات
وشافها وعيونها مثل الجمر
والخدود امن الدموع امجمرات
قال وزري لاتزيدينة وزر
اعروق قلبي من المحبة ناضجات
قالت ابلهجة محبة حان امر
انكشافه له دواعي وموجبات!!!!!
قبل خمس اسنين في يومن غبر
كنت والمرحوم وخمس من الخوات
في زيارة للكويت ام الدرر
وصار موقف لاجزا الله الظالمات
كنت انا وزوجي انتمشي عالبحر
واللي معنا من اخوات صالحات
وضايقنا كلنا وجيهن ودر
خمس ومع كل الاسف متنقبات
كلمن زوجي ونزرهن وكفهر
وجهه لكن هن حريمن ضايعات
نادن اشباه الرجال وماقدر
يذري روحة عن يدينن طايلات
وكنت انت الضابط اللي هو حضر
سالفة زوجي مع الناس الطغات
واشهد انك طيب وشهم وظفر
وفيك عزم ومرجلة وحزم وثبات
ذدت عنا ياعسى دربك خضر
بالكلام وباليدين وبالعصات
لين انهيت الشرار المستطر
أبتأسفهن لنا وهن صاغرات
ورحت عنا وكلنا فيك انهذر
هذرتن فيها النوايا طيبات
الا انا من بدهم قلبي استعر
وخايفه ربي ولا اد ري شالسوات
فزعتك سوتلها بقلبي اثر
مامحته ظروف وقتي العاتيات
ويوم شفتك قلبي ماصدق خبر
وجيتلك كلي ورب الذاريات
قال وعينه تذرف الدمع الحمر
امصدقة يا اصدق اللي صادقات
وضمها ومن عينها الدمع انحدر
وفوق كتفه سال كحل الخادرات
وشاش راسة وقال والله لينثبر
الدوام اللي اموره امصلحات
ومدد اسبوعين وقلبة ازدهر
وللحكايه افصول اربع باقيات.
تمت وكل
اعلاه لدنااااااااااااااه يعني ان الصدف ممكن اتسوي اسواها ومو بالضرورة شرح كل الحقيقة ومو بالضرورة ظروف وقتي تباين
بس الاكيد اني انا الحين فضفضت الفضفضة اللي فضفضتها ضرورة .
هذا وصلى الله على خير الانام
محمد المختار راعي الفضيلة
.:: إعلانات الموقع ::. 
07-21-2008, 09:34 PM
السلام عليكم __________ ( لايمكن لا ) 
العرض العادي
