هاك القصايـد ياسعـد كنّهـا اعـلاج=من شان جرحي ياسعد جبت طـاروق
جتك القصايـد ياسعـد والحـزن راج=حزنٍ يسوق القاف من هاجسي سوق
اكتب قصيدي في بحـر مـلّ لمـواج=بحرٍ عجز يكشـف خوافيـه مخلـوق
حالي كسيـفٍ ياسعـد هـم وازعـاج=يابو فرج ماني مـن الحـال معتـوق
نهجٍ نهجته غيـر عـن كـل منهـاج=خلّى ابقلبـي ياسعـد جـرح مفتـوق
شفني بديت ارمي همومـي بـالادراج=عزّي لهمٍ بيـن الاضـلاع مطـروق
من كان قبلي يا سعـد خاطـره مـاج=قبلي غدا منصور من جلد واعـروق
واذكر بكى مجنون وضحى وهو صاج=يبكي على وضحى به الهـم مرفـوق
وابن الملوّح سار فـي درب منعـاج=من بعد ليلى مابقـى للوفـى شـوق
والدحمي اللـي جـاب للهرج هـرّاج=من حب سعدا فـرّق الحـق بحقـوق
واللي خفانـا بيـن الاوراق محتـاج=ننبش عليه اليـوم برفـوق برفـوق
العشـق بـابٍ والمحاديـب مـزلاج=والهـم دقّ البـاب والبـاب مدقـوق
والقلب منتـج والبعـد هـزّ الانتـاج=خلا مـوارد خافقـي سهـم مبيـوق
صبّرت حالي بعدهـم والصبـر هـاج=والقلب جوّه عقبهـم رعـد وابـروق
وجدي دخلت الحب ما شفت مخـراج=وجدي غدى وجد ابدويٍ علـى نـوق
بالليل يشرب من عطاهـا وهـو داج=ويصبح عليه الصبح والنوق مسروق
بالحلم زار(ن) ياسعـد نـور وهّـاج=صرت اتحـرى جيّتـه دون مافـوق
احلف بنى من حول خفّاقـي اسيـاج=محد(ن) قدر يدخله بالحيـل موثـوق
حرّمـت بعـده ياسعـد كـل مغنـاج=ماريد غيره من هوا البيض معشـوق
اشكي وخلّي ياسعد مـا درى ابحـاج=شكواي للـي رافـع الهـم والعـوق
اسوق شعري واضوي الحرف باسراج=قلّه ولد عجرف عليك انـت مشفـوق
جتـك القوافـي هايمـه بالصـدر اج=واللي فقع كبد الهـواوي تـرى اوق
برمجت لك بعـض القوافـي تبرمـاج=برمجتهـا بالهـم والغـم والــذوق
عزّي لحـالٍ ياسعـد صابـه احـراج=شفتـه غـدا للهم سابـق ومسبـوق
بدعيه ربـي ياسعـد يفـرج افـراج=وايطفّي النيران فـي قلـب محـروق
صلاة ربّي عـد مـا طـاف حجـاج=على النبي سيد العرب خيـر مخلـوق