لاتدفنون الشيخ منصور ماجيت=خلوه لين أحب خشمه وجبينه
له قدر عندي ذايع الطيب والصيت=الطاهر الوافي لربعه ودينه
الصاحب اللي كل ماضقت دقيت=أشكي عليه الضيقه ولا الغبينه
وكان أيتبسم كل مابه تلاقيت=ويضمني ضمة غلا في يدينه
أخوي وشيخي في دياره تربيت=قبل السنين أتحدنا للمدينه
كنت الطفل وإن شفت منصور فزيت=وأقول ياليت أنا منصور وزينه
زين الفعل والشكل لو به تماليت=كل الخصال الطيبه له قرينه
ويوم ٍ كبرت مع القطامي تخاويت=مافيه كبر وكلنا عارفينه
ياما قطعنا كل صحصح وغنيت=وهو معي ماينشد الدرب وينه
وياما معه شبيت ناري وتقهويت=من بننا اللي تونا حامسينه
والحين راح وأنا حي ٍ وهو ميت=ياليتني معه ومعي دافنينه
أو ليتني أصقه ولالموته أوحيت=أومثل مجنون ٍ نسى والدينه
يمكن عذابي خف ولاصحت أونيت=أون مثل اللي عمى الموس عينه
ياشيخ رحت ولو تأذيت ماأذيت=تبكي عليك المرجله والسمينه
ويبكيك نجد ويشهق أرطاوي حليت=والضلع يبكي والذيابه حزينه
ويبكيك غيم ٍ من رذاذه توضيت=ويبكيك ورد الأرض مع ياسمينه
ويبكيك مسجد فيه أميت وصليت=ويبكي عليك الطيب مع كاسبينه
ويبكيك دلو البير وكل نخله أسقيت=وأبكيك أنا والناس في حال شينه
ويبكيك ذود ٍ مابرك من توفيت=ويبكي عليك القبر وينوح طينه
يالله ياللي بأمرك نحج للبيت=يالواحد اللي كلنا عابدينه
تغفر لعبدك ياإله ٍ تعليت=منصور أبن وديد يالله تعينه
الله يرحم ذايع الطيب والصيت=آمين قولوا قولي ياسامعينه