الله من قلبٍ على مرتع الخور =كنه هشيمٍ دمدم العود بالي
كني غضيض اللي مع الخبت مسعور=باقي من المده ثلاثه ليالي
يكفخ بلا ريشٍ وينفخ بلا زور=ويكفيه عن رد الجواب السؤالي
دنياك يا خالد على السرج ولكور=ما تفجع الا من زحول الرجالي
تجبر عراوي الكلب والبوم والثور=وتكسر عراوي الطيبين العيالي
تنزل مقام مخرقة كل طابور=وترفع مقام مخرزين النعالي
شاخت بها الأذناب لحاسة السور=سود الوجيه مبيعين الشيالي
فيه وليد اللاش وعالم ودكتور=ولقيطة الحجاج حضرة معالي
وسلالة الجزار مطوة وساطوره=تأمر علينا في العصور الوالي
فإن كان ياخالد معنى منجور=ما حدٍ يا ابن مدعث من الوقت سالي
وانته عريبٍ وافي الجد مخيور=يا صلب زايد يا كريم السبالي
أما مع تقطع من العرق مشبور=والا قطعت العرق كله لحالي
روحي مثل روحك على سبق مطيور=ما بين قولة لا تجين وتعالي
فكان الزمان بحدة البدو مامور=يا لوم قلبي يوم ينحاس بالي
ترى يخالد ما ورا الشرف مذخور=ولا احدٍ يهد والطير والقاع خالي
من عقب حنا ذرى كل مظهور=على سروج الصافنات المتالي
تنتف شواربنا على غير مبرور=ونشرب مرار ويشرب الغير حالي
يا طى الثعل هامة ثمانين منعور=والذيب عود فرسةٍ للرخالي
و ولد الردي لاجاء على راس عنقور=يبلاك في نفسه لو أنك مثالي
صيده ليا جابه زريطي وعصفور =يوم النشامى ماتصيد الهزالي
بالهرج عدة نابية كل عثمور=والفعل ما ملى صغار السحالي
يوم ان كل إله حيله ومقدور=جداه كشخة غترته والعقالي
ولدة حرامٍ بارد الخد مقصور=هيسٍ يكبر موخره بالسمالي
سبوٍ جبو قدره مع الناس محقور=وش عاد لو عدى الرجوم العوالي
خبلٍ يدور مع قفا الناس ثغرور=والقفو ما نوخ ظهور الجمالي
والعنز لو ربي رزفها بزمّور=ما يحتميها من ذياب السهالي
ومن لا يحوش الطيب والعمر ميسور=مايدركه لي ما غشاه الثفالي
فياللي تعذربنا هبيلٍ ومطيور=أجل البداوه عيب؟ لا يالخمالي
كان البداوه عيب مانيب مصغور=يالطيب عيب معطرين السلالي
حنا البدو أحرار واسود ونمور=سيفٍ ويقص مروبعات الحبالي
حنا البدو وحنا عمى كل مغرور=ما حنْ عيال مضببين الدلالي
يشهد لنا من حدر الالحاد مقبور=ويشهد لنا في القاع من لايزالي
حنا البدو وسيفٍ بالامان مشهور=وتشهد عليه قصارها و الطوالي
لانقطع الذمه..ولانشهد الزور=لانتلب العاني ليا جاك جالي
ولانقلب المله..ولانطرد العور=ولانسهج الشينات وسط المفالي
ولاننقل العجرا..ولانطلب الغور=ولانلحق الكف اليمين الشمالي
ونذبح العجفا..ولانسبق الدور=ولانطرد المقفي لشد الرحالي
ولانزرع الصبخا..ولانحفر القور=ولانطرح الا من السمان الجزالي
ولا نعبد الرتبه ولو هو امبراطور=ولانهاب الا عزيز الجلالي
ولانخلف الهقوه.ولانطلق الحور=الا على طيب وحافظ ووالي
مانقطع الساقة.ولا نبعج الشور=ولا ندغر القاله بقيل وقالي
ولا نبخس الكليه.ولانجحد النور=ولاحِنْ من اللي يكنزون الريالي
ولانشعب الذله.ولا نخاوي البور=زرق العيون ضراب شرد السحالي
ولانضرب الطبله.ولا نشحد الكور=فضلة عبيدٍ للأكابر موالي
ولا ندهل العِبْلة ولو طورها طور=والزرق في يد من عليه اتكالي
حنا البدو يوم اكثر الناس طرطور=ناطى صما صيم الجبالي
عشة,ولاقصرٍعلى الذل معهمور=نلعب عليه الهملا هملالي
عشة تدوم ولو على سبعة بحور=ولاقصر لامالت به الريح مالي
حنا البدو يوم اسهب الملح منثور=يا ما خزمنا روسها ما نبالي
رجّالنا في حامة الحرب مسطور =ورضيعنا مع ضرب الاشهب يلالي
حنا على كبد العدو مر ممرور=وعلى الخوي ميًّ قراحِ زلالي
ما قد وخذ من حقنا كبر الاظفور=مير الدهر خلى الخفايف ثقالي
من خلقة الدنيا إلى نفخة الصور=البدو اخيرالناس اول وتالي
ذباحةٍ يوم اول الوقت مذعور=حماية المركي نهار القتالي
فحولٍ وسادتنا حصا كل شنظور=ولحافنا بيض النجوم المدالي
مانبدي الشكوى لخاطر ومخطور=ألا على الواحد احد ذو الجلالي
ولا نغبظ الحاكم على حكمه الدوُر=اليا رعينا في الفياض الخوالي
يا ما حلا سوق المعاشير بقفور =ونجم السويبع مثل قرن الغزالي
في خايعٍ توه من الوسم ممطور=نوار عشبه مثل نقش الزوالي
إبل رعوها البدو مع كل عثور=تسوى شبحات الوجيه المكالي
روحك يا ابن مدعث على ريشة كرور=اخذ بها صفر العراقيب تالي
وان عذربوها بأشقر الكيف معذور=أغاديه يذهب عن حشا الجوف صالي
وان عذربك من سلحة الناس مسمور=اشرب وطق مشقره لاتمالي
قبلك شربه الجِهر ناصر ومنصور=وعضيب وعقاب عنِزَة والهلالي
وشرب ازرق الدخان ماهوب محظور=العيب زرع الهافيه عند غالي
ابشر يا خالد دام لي دم يفور=مانيب من هو قال دور بدالي
أما خذينا حقنا واقبل النور=ولا ترانا من بنات الحلالي
ماني وأنا ناصر بهورٍ ولد هور=وأنا الذي من راس عمي وخالي
فيالله في كونٍ مثل كون جمعور=هشهاش باروده سوات الخيالي
يصبح به الهافي عن العز مكسور=ويصبح به الطيب على راس عالي
ناخذ به خفاف الموازين بالدور=وكم راس نذلٍ عن كتوفه يشالي
والنصر الي قالوا على الضد منصور=ما هو على زعلة خويً قبالي
وما قل دل وزبدة الروض حمرور=والا كثير الهرج ماله ومالي