ما يملي عيون الرجال مـن الرجـال الاّ الزحـول=أبصم عليها بالعشـر .. عـن اقتنـاع وتجربـه
واصدق احاديـث الزمـان تقولـه كبـار الفعـول=ما هو حديـث الألسنـه لـو وثّقتـه المكتبـه !!
والمدح لا من قيل في رجـل ٍ يقـول ولا يطـول=كنّـه : مسبّـه ابطريقـه راقـيـه ومهـذبـه !!
والقلب ضحكة صبح مترامي وبالحـزن مغسـول=تجمّع الأضـداد فـي صـورة جمـال مرتبـه !!
والشعر (فارس حلم) والفكـره (حياويّـه بتـول)=وانا الـذي يرسـم تفاصيـل (الزفـاف) ويكتبـه
ما جيت اروّج للهزل واحـاور كفـوف الخبـول !=من باب كسب اعجاب ساذج من سذاجة معجبه !!
ولا جيت اقول ان التكبّر شـرط تبريـر الوصـول=دام الوصول احيان ما يحتـاج شعـر وموهبـه !!
لا والله الا جيت ابنشـر فكـر واخاطـب عقـول=لو اكثر اكثرهم ( نمـط تواجـدي ) مـا يعجبـه
يكفينـي اعجابـي بذاتـي روح وافكـار وميـول=وتفاخري لامن لقيت ان ( بيني وبيني ) شبـه !!
ماني بنافس غير أنا !! واحساس في صدري يجول=احيان اقوله واكتبـه واحيـان يكفّـي اشطبـه !!
والبارحه مثل السنه .. تجارب ووقـت وفصـول=عطت ضميري من دروس الوقـت مالـم يطلبـه
زلة خوي ّ .. وطعنة صحيب .. وتشمّت من عذول=ياااكبرها فـي حـق مـن يفخـر بفعلـه وشنبـه
تطلّـع الرجّـال مـن طـوره وتدخلـه الذهـول=مابين يصدّق ما حصل !! أو ما حصـل يكذّبـه !!
لا بارك الله في النوايا البيض لاصـارت تحـول :=من دون عرفك صـدق نيّـة صاحبـك ومذهبـه
لكّن .. دامك محترف يا صاحبـي دق الطبـول !=حاول تلاقي لك مكان بخلـف ظهـر المطربـه !!
ما عاد لك عنـدي .. مقـام ولا مـلام ولا قبـول=وجّه على حظك (ركايـب لـوم نفسـك) واندبـه
ويا صوتي المبحوح .. ساعدني آباغني واقـول :=شي ٍ وقف لي اسهلـه ! قـدّام افكـر باصعبـه !
الحب .. هبّل في عقل قيس وترك قيـس مهبـول=وانا على حده سبـب مـن مـر قلبـي وسلبـه :
الفارع اللي كنها مختاره من الطـول .. طـول!!=يلبق على رزة جسدهـا لا تحـرك ( موّكبـه ) !!
اليا مشت تنتابك الحيره .. ويذْبحـك الفضـول :=كن بعضهـا ماهـوب وياهـا وكنهـا تسحبـه !!
لبّا غنجها .. والكلام الذرب .. والطرف الخجـول=اللـي اليـا سلهـم عرفـت ان المنيّـه بسببـه
وانا ( نحيل شعور ) لو ماكان في جسمـي نحـول=وآخـاف يغلبنـي غـرام عيونهـا ولا اغلـبـه
والموت .. ماهو من خسارة خافق الغروّ الجفـول=الموت .. لامني دريت ان غيري يقـدر يكسبـه !